CEBU, Philippines - Gipahibawo sa mga nagdumala sa gipasirad-an sa Department of Health nga Regional Blood Coordinating Council (RBCC) nga ila nang gisugdan ang pagpanghatag og libreng dugo ngadto sa mga kabos nga pasyente. Apan ang nangulo sa RBCC nga si retired Col. Romeo Capuyan mipasabot nga ang ila rang mahatagan niini mao lamang ang mga pobreng mga residente dinhi sa Sugbu ug ang mga card holders sa RBCC.
Gipasabot usab niini nga dili gyud sila ang mangunay paghatag sa libreng dugo sanglit wala na man sila hatagi og pagtugot sa DOH.
Apan ang ilang buhatan nga gihatagan og suporta sa kagamhanan sa siyudad sa Sugbu, igo rang mohatag og 1,500 pesos nga bayad sa screening sa dugo aron libre kining makakuha niini diha sa Philippine National Red Cross (PNRC). Matud pa niini nga ilang gamiton ang nahabiling pundong mokabat ngadto sa P1.6 ka milyon gikan sa halin sa ilang gipamaligyang ekipo dihang gipaundang sila sa pag-operate sa DOH. Giklaro niini nga ang ilang buhatan muhunong sa pagpanghatag og libreng dugo sa higayon nga mahurot na ang ilang pundo. (BANAT NEWS)