Pangaliya Batok Sa Dengue: Simbahan mipagawas na og 'Oratio Imperata'

CEBU, Philippines - Gumikan sa nagkadaghang kaso sa sakit nga dengue dinhi sa Central Visayas ug sa tibuok nasud, ang Simbahang Katoliko sa Sugbu mipagawas na og ‘Oratio Imperata’ aron mangamuyo sa Kahitas-an batok sa maong makamatay nga sakit.

Ang maong pag-ampo gitumong ni Cebu Archbishop Ricardo Cardinal Vidal aron kapugngan ang padayong pagdaghan sa mga nataptan sa maong sakit.

Usa ka 2-anyos nga batang babaye nga taga sitio Tabay sa barangay Pooc sa dakbayan sa Talisay ang nakalas sa maong sakit niining bag-ohay lang tungod sa maong sakit.

Sumala pa sa Department of Health-7 ang dengue stage 3 ug stage 4 maoy labing delikadong strain sa dengue. Kini mao ang pagpakita na og bleeding sa pasyente ug ang kataas sa hilanat.

Kun ang pasyente magpakita na niining maong mga sintomas kinahanglang dad-on na sila ngadto sa tambalanan aron maatiman.

Ang Oratio Imperata batok sa sakit nga dengue nangaliya nga panalipdan ang katawhan gikan niini. Lakip sa giampoan mao si Sr. Santo Niño de Cebu, Birhen sa Guadalupe de Cebu ug ingon man si Sr. San Roque.

Matud pa sa pag-ampo ang dengue nahimo nang hulga sa kinabuhi sa tawo ug misaad nga ang katawhan sa iyang bahin mohimo gyud og mga lakang aron kapugngan kini pinaagi sa pagpanglimpyo.

Lakip sa gipanaad diha sa maong pag-ampo mao ang pag-atiman sa kinaiyahan ug magmatinabangon sa mga nagkinahanglan.

Ang maong pag-ampo litukon ini og kahuman sa tanang Santos nga Misa ilawom sa Artsideyosisi sa Sugbu.

Base sa talaan sa DOH sa kaulohan miabot na sa 70 mil ka mga tawo ang nataptan niining maong sakita sukad niadtong Enero hangtud sa katapusang semana sa bulan sa Agosto.

Pipila sa mga barangay sa Iloilo ang gibutang na sa dengue outbreak gumikan kay mas midaghan ang gidaghanon sa mga natalang kaso sa ilang mga dapit kumparar sa milabay’ng tuig.   (BANAT NEWS)