Mihiwasa kay wa maimbitar sa piyesta gipusil

CEBU, Philippines - Samaran ang usa ka lalaki nga gipusil human kini giingong nanghagit og away kay nasuko nga wala siya imbitaha sa fiesta sa sitio Sanlusong barangay San Isidro, Lungsod sa San Francisco isla sa Camotes.

Ang biktima nailhan nga si Teodulfo Batidor, 50, nga taga San Francisco samtang ang suspetsado nailhan usab nga si Carlito Papa, 40, silingan sa biktima.

Sumala sa kapolisan nga ang misumbong sa maong hitabo ngadto sa ilang buhatan mao si Raymund Gonzaga nga silingan sa biktima ug sa suspetsado.

Sa imbistigasyon sa kapolisan, nasayran nga ang hinungdan nga nasuko ang biktima ngadto sa suspetsado mao ra gyud ang kapakyas sa naulahi sa pagdapit sa biktima sa piyesta sa sitio Baring sa maong lungsod.

Samtang nagpunay og hiwasa sa kasuko, kalit lang mitunga ang suspetsado ug dihadiha giluthang ang biktima sa walang bahin sa iyang dughan busa mihilom kini.

Ang biktima daling gihatod ngadto sa Ricardo Manigo Memorial Hospital sa maong lungsod apan gibalhin ra usab dayon kini sa usa sa mga tambalanan sa syudad sa Sugbo tungod sa katalandugon sa kahimtang niini.

Samtang ang suspetsado boluntaryo usab nga mitahan sa iyang kaugalingon uban sa usa ka Ruben Ramirez nga iyang silingan ngadto sa kapolisan sa lungsod.

Matud pa ni Hermocilla nga wala pa usab sila masayod kun unsa nga klase sa armas ang gigamit sa suspetsado kay wala pa nila makuha ang impormasyon gikan sa biktima. - BANAT NEWS