Val: Akyat barko girls lisod sakpan sa mga awtoridad

CEBU, Philippines - Si Mayor Valdemar Chiong sa lungsod sa Naga nagkanayon nga lisod sakpon ang giingong mga babayeng nagbaligya sa ilang dungog nga manaka diha sa mga barko nga modunggo sa lungsod.

Matud ni Chiong nga duna silay nadawat nga report kabahin sa nahisgutang mga Akyat Barko Girl diin uban kanila mga minor de edad.

Ang nahisghutang mga babaye kasagaran giingong dili taga Naga ug manakay lang kini og pumpboat gikan sa laing dapit.

Matud usab sa mayor nga ang maong mga babaye maayong maniid kun dunay mga foreign vessel nga moduong nga maoy kasagaran nilang sak-on.

Dili malikayan nga dunay sama niining mga klaseng tawo nga ang panginabuhian magbaligya sa ilang dungog ug anha kasagaran maglibod-suroy sa mga progresibong mga dapit, sumala pa ni Chiong. Apan wala ipasabot nga pabor siya niini tungod kay delikado kini sa sexually transmitted disease (STD) ang maong mga babaye ug ang mga lalaki nga makighilawas kanila.

Gibutyag ni Chiong nga ang mga mananagat iyang gitugotan nga maka-estambay sa kabaybayonan sa Naga aron makahatod-kuha sa mga pasahero gikan sa barko paingon sa baybayon ug balik sa barko.

Ang maong mga mananagat gisangonan usab sila sa pagpaniid sa nahisgutang mga babaye nga gitawag og “AB” o Akyat Barko.

Si Chiong midugang nga susihon niya kun duna bay balaod sa lungsod kabahin sa vagrancy, ug kun duna man gani pahugtan na niya kini sa pagpapatuman.  - BANAT NEWS