Pugante natipi sa taga-CIDG-7

CEBU, Philippines - Napatay ang usa ka pugante nga misukol pinaagi sa pagpakigpinusilay sa mga sakop sa Criminal Investigation and Detection Group (CIDG)-7 kagahapon sa kaadlawon sa sitio Calo, barangay Kahumay-humayan, dakbayan sa Danao.

Ang napatay sa engkuwentro giila nga si Gelacio Villanueva alyas Boboy nga taga Corte, lungsod sa Carmen, Cebu.

Si Sr. Insp. Ricky Neron sa CIDG-7 mitug-an sa mga tigbalita nga duha ka adlaw nilang gigukod si Villanueva human madawat ang impormasyon sa usa ka impormante nga nagtagotago kini sa usa ka bukirang barangay sa Danao.

Si Villanueva nag-atubang og kasong murder tungod sa kamatayon sa guwardiya sa farm sa magpapatigayong Lhuillier.

Matud ni Neron nga kagahapon sa kaadlawon, siya ug iyang mga kaubanan sa CIDG-7 miadto sa hide-out ni Villanueva diin didto naaktuhan nga uban sa lain pang duha ka lalaki. Sumala pa nga ilang gisangpit si Villanueva dungan sa pagpailang sila mga sakop sa CIDG-7 apan kalit lang silang gipamusil. Mibalos sila sa pagpusil kang Villanueva.

Si Villanueva nakaangkon og daghang samad pinusilan sa kalawasan ug ulo samtang ang laing duha niya ka kauban nakaikyas.

Ang mga sakop sa CIDG-7 mao pay midala kang Villanueva ngadto sa Danao District Hospital apan gideklarar siyang dead on arrival sa mga doctor.

Matud niya ang patay’ng lawas ni Villanueva gihiling sa mga sakop sa Scene of the Crime Operatives (SOCO). Nakuha sa CIDG-7 ang .45 kalibre nga pistola nga giingong gipanag-iya ni Villanueva apan wala pa matino kun pila ka bala ang nahabilin niini ug kapila usab nakapabuto.

Si Villanueva naka-eskapo sa Carmen Police Station niadtong Septiyembre 29, 2006 human iyang napatay si Emiliano Mejares sa barangay Corte.

Apan pagka-Marso 2008 mi-eskapo si Villanueva sa Carmen Police Station ug gikan niadto nagtagotago na siya sa bukirang bahin sa Danao ug Carmen. Dugang nasayran ni Neron nga si Villanueva giingong sakop kaniadto sa Joshua Paring Robbery Group nga responsable sa pagtulis sa M. Lhuillier Pawnshop sa Carmen. Si Paring napatay sa mga sakop sa CIDG-7 sa miaging tuig human misukol ug nakigpinusilay sa dihang wala kini mosurender.

Matud ni Neron si Villanueva maoy mipuli ni Paring sa ilang grupo. Gawas niini, si Villanueva maoy responsable sa sunodsunod nga kawat sa mga hayopan sa Carmen apan ang mga tag-iya sa hayopan wala gyud moreklamo batok kaniya.

Dugang nahipos nga kasayuran nga si Villanueva sa nabilanggo pa kini sa Carmen Police Station giingong priso-kabalyero ug sugosugoon siya ni Sr. Insp. Carlos Reyes sa dihang mao pa kini ang hepe sa Carmen Police Station, hangtod mipuga kini niadtong 2008 ug ang jailguard nga iyang gipugahan niadtong higayona giingong gilabay na og laing lugar.  - Rey Pasaporte, Darrel Carumba ug Romeo Limpangog (BANAT NEWS)