Magsuon nanulis ni maam

CEBU, Philippines - Magsuon nga nanulis og magtutudlo nasikop pasado alas 11 sa miaging gabii sa eskina sa sitio Cayong, barangay Tiber, lungsod sa Minglanilla.

Ang magtutudlo nga biktima sa tulis mao si Ferlyn Tura de Gracia, 23, nagtrabaho sa Asian College of Technology sa barangay Bulacao, dakbayan sa Sugbo.

Samtang ang magsuon nailhan nga sila si Mohene ug Anenias Villacencio nga pulos molupyo sa maong lugar ug habal-habal driver.

Matud pa ni PO1 Mark Rosaroso sa Minglanilla Police Station nga sa usa ka eskina paingon sa balay sa biktima gisugat kini sa magsuon ug gitulis.

Sa kahadlok ni de Gracia, iyang gihatag ang iyang bag nga adunay sulod nga P1,500, duha ka cellphone ug mga dokumento.

Human sa panghitabo daling misibat ang magsuong Villacencio, samtang ang maestra misumbong kang PO1 Lord Cañada nga nadestino sa Regional Mobile Group.

Nasigpatan ang magsuong Villacencio sa estambayanan og mga habal-habal hinungdan nga gisikop kini ni PO1 Cañada ug gi-turnover sa Minglanilla Police Station.  – BANAT NEWS