Taxi drivers manglubag dakpon

CEBU, Philippines - Hingusgan sa kadagkuan sa Cebu Ports Authority ug ubang ahensiya sa gobyerno kining mga taxi driver nga manglubag sa ilang mga pasahero gikan sa barko nga modunggo sa pantalan.

Kagahapon nagtagbo ang manager sa CPA nga si Vicente Suazo ingon man ang direktor sa Land Transportation Office (LTO)-7 Atty. Raul Aguilos, Land Transportation Franchising and Regulatory Board (LTFRB) director Benjamin Go, CITOM head Sylvan Jakosalem ug gipirmahan ang memorandum of agreement (MOA) nga duna nay accreditation ang mga taxi nga mosulod ug mamasahero sa pantalan.

Ang programa agi’g tubag sa daghang reklamong nadawat sa CPA nga kasagaran sa mga taxi driver dili mogamit og meter o kaha ilang lisud-lisoron ang pasahero pinaagi sa pagpakanaog sa dapit nga wala kaayo moagi nga sakyanan sa higayon dili mosugot ilang gi-demand nga pletehan.

Si Suazo miingon nga ning bag-o nilang programa ang mga pasahero, sa dili pa mosakay sa taxi diha sa pantalan, mohatag og complaint sheets ang mga guwardiya ug ilista daan ang body number sa ingon niini dali ra silang makapadangat sa ilang reklamo.

Matud ni Suazo kasagaran sa nadawat niyang reklamo mao kadtong mga langyaw ug lokal nga turista nga mobisita dinhi sa Sugbo gikan sa laing probinsya. Si Jakosalem miingon nga adunay mga Citom personnel ug polis nga i-deploy sa port area kun adunay modunggo nga barko.

Si Aguilos sa iyang bahin nagkanayon nga mohatag siya og citation tickets ingon man temporary operators permit (TOP) sa mga personnel sa CPA ug Citom nga madestino sa pantalan.  – BA NAT NEWS