CEBU, Philippines - Nagtingkagol sa Argao detention cell ang usa ka 27-anyos nga lalaki kinsa suspetsadong pusher og shabu human kini masikop sa gipahigayong buy-bust operation sa kapolisan sa nahisgutang lungsod kagahapon sa buntag.
Ang suspetsado mao si Arnel Campaner Secretaria, ulitawo ug residente sa maong dapit.
Na-recover sa mga polis gikan sa posisyon ni Secretaria ang lima ka paketeng shabu ug duha ka P500 nga marked money nga gigamit sa poseur buyer sa pagpalit sa nahisgutang ginadiling drugas.
Si PO2 Von Tecson, duty desk officer sa Argao Police Station nga nahinabi sa Banat News kagahapon nagkanayon nga nakadawat sila og report kabahin sa giingong ilegal nga kalihukan ni Secretaria hinungdan nga ilaha kining gi-monitor. Sila si SPO1 Arnold Abiner, PO3 Elizer Canada, PO2 Rodrigo Teo ug PO1 Marvin Chin uban sa civilian nga poseur buyer ang mipahigayon sa buy-bust operation.
Si Secretaria gikataktang pasakaan og kasong kalapasan sa Section 5 sa Akta Republika 9165 kon “Comprehensive Dangerous Act Law” karong adlawa ngadto sa Provincial Prosecutor’s Office. (BANATNEWS)