Tourist arrivals wa mokunhod

CEBU, Philippines - Wala kaayo mabatyagi ang epekto sa hostage-taking nga nahitabo sa Manila gumikan sa padayong pag-abot sa mga turista dinhi sa Sugbu sumala pa sa usa ka opisyal sa Mactan Cebu International Airport Authority (MCIAA) apan ang mga hotel sa dakbayan sa Lapulapu mipatuman og singkwenta porsiyentong diskwento sa ilang bookings alang sa mga turista agi og pagbawi sa negatibong epekto niini sa turismo.

Si Amit Cuizon, ang public information officer sa MCIAA mibutyag sayo niining bulana nga wala pa nila mamatikding mius-os ang tourist arrivals ug departures dinhi.

Nanghinaot siyang walay makanselar nga mga flights gikan sa Hong Kong kansang walo ka molupyo nakalas sa maong hostage-taking sa Rizal Park sa Manila maong mipagawas sila og ban pagbisita sa nasud sa ilang mga residente.

Si Lapulapu City Mayor Paz Radaza uban sa mga lokal nga kadagkoan sa nagkadaiyang hotel, resorts, island hopping trips, ug dive shops sa maong dakbayan nagkauyon sa pagpatuman og mga diskwento sa mga local tourists.

Kini aron matapakan unya ang posibleng epekto sa maong hostage-taking kun magsugod na og kunhod ang pag-abot sa mga langyaw’ng turista dinhi.

Matud pa ni Ember Mendoza ang General Manager sa Waterfront Mactan and Casino ug maoy bag-ong natudlo nga Executive Director sa Lapulapu City Tourism Commission nga susama sa milabay’ng krisis sa ekonomiya lukop kalibutan ang mga lokal nga turista maoy nakasalbar sa alkanse sa ilang mga establisamento.  (BANATNEWS)