CEBU, Philippines - Giaprobahan sa konseho sa dakbayan sa Talisay atol sa gipahigayong special session niadtong Biyernes ang P8.2 milyones nga budget sa calamity fund alang sa “disaster preparedness, calamity protocol and disaster relief and rehabilitation”.
Ang P1 milyon sa nahisgutang budget ang igahin alang sa dengue epidemic prevention and control measures ug pinansiyal nga hinabang ngadto sa mga nabiktima niini.
Aduna nay 137 nga natalang nasakit og dengue sa maong syudad ug pipila niini ang namatay sukad niadtong buwan sa Enero niining tuiga.
Mikabat ngadto sa P2.9 milyones nga pundo ang igahin sa construction sa sea wall nga magsalipod sa mga residente sa urban poor sa relocation sites sa siyudad apan wala mabutang sa resolusyon kung asang dapita nga relocation site tungod kay ang siyudad dunay daghang relocation site.
Samtang tabangan usab ang mga pamilyang naapektohan sa landslide niadtong buwan sa Agosto diha sa sitio Crusher, Lawaan III ug sitio Tigib, Lagtang lakip na ngadto sa barangay Jaclupan sama sa pinansiyal nga hinabang.
Ang konseho migahin usab og P500,000 nga budget alang sa drainage system sa Pooc Elementary School diin ang maong tunghaan bahaan kung mobundak ang kusog nga uwan. Samtang ang nahabiling pundo gamiton alang sa pagpaayo sa mga heavy equipment sa siyudad.
Ang minority councilor nga si Romeo Villarante misugyot nga ang buhatan sa city administrator mohatag og mga guidelines, kabahin sa pagpagawas og hinabang pinansiyal ngadto sa mga nabiktima sa dengue. (BANATNEWS)