CEBU, Philippines - Padayong gi-obserbahan sa mga mananambal sa Cebu City Medical Centar (CCMC) ang manag-uyab nga nakaangkon og daghang bun-og sa kalawasan human mibalitok ang giluwanan nilang motorsiklo nga nasaghid sa gutter ug miresulta sa pagkalamba nilang duha.
Nahitabo kini kagahapon sa kaadlawon sa dalan Gen. Maxilom Avenue, barangay Carreta ning dakbayan.
Ang nadisgrasya mao sila si Joseph Fortuna, taga Casili, lungsod sa Consolacion ug Angelica Hernandez, 20, dalaga ug taga Jagobiao, dakbayan sa Mandaue.
Matud pa ni PO3 Edgardo Vicoy sa Traffic Division sa Cebu City Police Office (CCPO) nga gikan sa uptown area silang Fortuna ug Hernandez luwan sa motorsiklo nga gimaneho ni Fortuna.
Samtang nagdulhog sa General Maxilom padulong sa Carreta kalit lang naigo sa gutter ang kilid sa motorsiklo hinungdan sa pagkabalitok niini ug nakaangkon ang duha og bun-og sa ilang kalawasan ingon man pagkapudpod sa mga ngipon niini.
Nagtuo si Vicoy nga nakainom ang drayber apan wala pa nila hingpit masusi tungod kay wala pa nila ma-estorya ang mag-uyab gumikan sa kahimtang niini sulod sa tambalanan. – BANAT NEWS