SA CCPO Tulis, kawat maoy nag-unang problema

CEBU, Philippines - Ang pagpanghilabot sa butang sa uban maoy nag-unang krimen nga natala sa Cebu City Police Office sumala pa sa bag-ong milingkod nga direktor sa maong buhatan nga si Sr. Supt. Melvin Buenafe.

Si Buenafe atol sa pormal nga pagbukas sa Crime Prevention Week niadtong milabay’ng adlaw nanawagan sa publiko nga mag-amping ug dili magpasaya-saya aron mahimong biktima.

Nibutyag siya nga base sa talaan sa CCPO, ang dunay labing daghang insidente natala diha sa Theft and Robbery Section, gisundan kini sa physical injuries ug crime against person gamit ang dili lisensyadong armas.

Usa sa giingong hinungdan sa kadaghan sa mga kaso sa pagpangawat, tulis, pagpanglabni ug uban pang pagpanghilabot sa mga kabtangan mao ang kawad-on sa mga tawo ug ang kabaskog sa ekonomiya sa siyudad.

Samtang kabahin sa mga krimeng may kalambigitan ang dili lisensyadong mga armas, gibasol kini ni Buenafe sa padayong pagpamuhat og mga paltik nga armas diha sa dakbayan sa Danao.

Sumala pa niini sagad sa mga mamuhatay og armas diha sa Danao dili mga rehistrado ug mao say nag-unang source sa mga paltik nga gamiton sa mga krimen.

Nunot sa kasaulogan sa Crime Prevention Week makigtagbo si Buenafe sa nagkalain-laing sektor sa katilingban lakip na ang Parents and Teachers Association aron magtinabangay sa pagpakabana nga mapatunhay ang kahusay’g kalinaw sa dakbayan.

Pahingusgan ang checkpoints ilabi na batok sa mga motorcycle riding gunmen, foot patrols, night watch system sa mga lugar inabagan sa mga civilian volunteers ug ang pagdugang og augmentation cops gikan sa Regional Mobile Group.

Sa pagkakaron 1,200 ka mga tawo ang bantayan sa matag usa ka polis sa CCPO base sa gidaghanon sa populasyon ug gidaghanon sa pwersa sa kapolisan. – BANAT NEWS