CEBU, Philippines - Gihatagan og 24-oras aron makatubag ang duha ka mga polis kinsa duty jailers dihang naghikog ang usa ka piniriso diha sa Talisay City detention cell niadtong Martes sa gabii.
Si Inspector Hugo Rio Ipong kinsa maoy mipahigayon sa imbestigasyon sa hitabo sa pakighinabi niini sa Banat News kagahapon nagkanayon nga sila si SPO3 Cleofas Bonjoc ug PO2 Jaime Abellana gipadalhan na og memorandum nga sila paesplikaron.
Kini may labot sa paghikog ni Cielo Hernani Bacus diha sulod sa detention cell ug dako ang posibilidad nga mag-atubang og kasong administratiba o kriminal ang duha kun ugaling makit-ang aduna silay sayop.
Gibutyag usab ni Ipon nga hangtud kagahapon sa buntag wala pay mipatim-aw nga mga paryente o higala ni Bacus nga mo-claim sa patay’ng lawas niini diha sa Saint Francis Funeral Homes sa barangay Bulacao, Talisay.
Ang mga polis miadto usab sa sitio Mananga II, Tabunok nga maoy gibutyag nga address ni Bacus apan walay miangkon nga paryente niini o mga higala.
Tungod sa nahitabo mas gipahugtan sa kapolisan ang pagbantay sa ilang mga bilanggo.
Base sa imbestigasyon nila ni Ipong nga sukad napriso si Bacus niadtong Agosto 25 tungod sa kasong karnaping walay bisan usa sa mga paryente o higala niini ang miduaw kaniya ug maoy posibleng hinungdan sa paghikog niini. – BANAT NEWS