Nabutha'g dinamita 1 patay, 1 napungkol

CEBU, Philippines - Patay diha- diha ang 22 anyos nga lalaki samtang naputlan usab sa kamot ang iyang amahan human mabuthi sa dinamita nga gigamit nila sa pagpanagat didto sa kadagatan sa barangay Tominjao, sa lungsod sa Daanbantayan, niadtong Martes sa buntag.

Ang namatay mao si Dexter Yaun, 22, ulitawo, samtang ang iyang amahan nga si Nicasio Yaun, 46, nga pulos taga Daanbantayan, maoy naputlan sa tuong kamot.

Si PO2 Alfredo Mandal sa Daanbantayan Police Station mibutyag sa Banat News nga ang amahan ug anak didto sa ilang balay sa daplin sa baybayon dihang nakadungog sila og mga estorya sa mga silingan bahin sa bagang labo sa mga isda dili halayo sa lapyahan sa dagat sa ilang lugar.

Busa gimandoan dayon ni Nicasio ang iyang anak nga si Dexter sa paggama og dinamita nga ilang ipabuto sa naglabo nga mga isda.

Unya sa didto na sila sa dagat, malagmit gumikan sa kahinam nga makuha ang tanang nagtapok nga mga isda giduslitan dayon ni Nicasio ang pabilo sa dinamita pinaagi sa lighter niini, apan sa dihang iya na kining giitsa, imbis adto motugpa sa labo sa mga isda, didto man hinuon motugpa sa ulo ni Dexter.

Didto makabuto ang maong dinamita sa ulo ni Dexter nga maoy hinungdan sa hinanaling kamatayon niini.

Matud pa ni PO2 Mandal nga dihang gisusi sa mga silingan human mabati ang sipa kaayong buto sa dinamita, nagbuy-od na ang duha nga pulos naligo sa kaugalingon nilang dugo,

Si Dexter nakabsan dayon sa kinabuhi, samtang si Nicasio wala nay kamot nga tuo.

Gideretso paghatod sa mga tagtungod si Nicasio sa Vicente Sotto Memorial Medical Center sa dakbayan sa Sugbo.

Matud pa sa kapolisan nga ang maong hitabo maoy magsilbing leksyon sa mga mananagat nga padayong milapas sa balaod batok sa paggamit og ilegal nga panagat sama sa dinamita ug uban     pa. (BANAT)