Ouano mosuporta sa kampanya bahin sa renewable energy

CEBU, Philippines - Si Provincial Board Member Thadeo Z. Ouano misuporta sa kampanya   sa paggamit og renewable energy alang sa hustong suplay sa kuryente dinhi sa Sugbo.

Kini tungod kay luyo sa kadaghan na nga mga kompaniya ang nagtukod og planta sa kuryente apan kuwang lang gihapon ang suplay sa kuryente dinhi sa lalawigan.

Si Ouano nga maoy chairman sa committee on environment sa hunta probinsiyal sa Sugbo miingon nga labing magkuwang ang suplay sa sugang dagitabnon sa higayong adunay planta nga maaberiya busa nagkinahanglan kini karong tun-an pag-ayo sa kagamhanan sa maong isyu.

Usa sa solusyon niini matud ni Ouano mao ang pagbaton og dugang tinubdan sa enerhiya aron dili mapalyar ang dagan sa nagkalainlaing industriya dinhi sa Sugbo.

Busa alang kang Ouano gikinahanglan gayud sa gobyerno nga mangombinse. Gipasabot niya nga ang kagamhanan angay gayod nga modapit usab og dugang pa nga mga negosyanteng taga gawas sa nasud nga mobubo og puhonan alang sa planta sa kuryente apan bantayan usab nga dili makadaot sa  kalikopan.

Sayo niini si Ouano ug uban pang mga sakop sa hunta probinsyal naminaw sa mga hunahuna sa mga environmentalist nga girepresentahan ni Vince Cinchez, ingon man sa taga Department of Energy (DOE) nga girepresentahan ni Regional Director Antonio Labios ug sa “Clean Coal Power Plant” nga girepresentahan ni Edicio Satina sa renewable energy.

Si Labios miingon sa mga sakop sa hunta probinsyal nga ang nasud mahimong makaprodukto og kapin kon kulang 3,000 MW sa “renewable energy” .

Samtang si Gobernador Gwendolyn Garcia nagpadasig usab sa paggamit sa renewable energy dinhi sa Sugbo.

Dugang pa ni Ouano nga ang iyang komitiba maningkamot nga kapanalipdan ang kalikopan samtang ang clean coal power plant tukuron aron pagsulbad sa kakuwang sa kuryente dinhi sa Sugbo. (BANAT)