SWAT sa Lapu labing kompleto

CEBU, Philippines - Kun hisgotan ang kakompleto sa mga kahimanan alang sa unsa mang krisis, walay makabintahang dakbayan ug lalawigan sa dakbayan sa Lapulapu,dinhi sa nasud , matud pa ni PSSupt Mariano Natuel Jr., ang director sa Lapulapu City Police Office.

Gibutyag kini ni Natuel dihang nagpalabwanay ang mga dakbayan sa Sugbo ug Mandaue bahin sa kakompleto nila og mga kahimanan sa panahon sa unsa mang krisis nga sama sa nahitabo didto sa Manila.

Gani gumikan sa kakuwang og kahimanan sa kapolisan sa Manila napakyas sila sa pagsulbad nga malinawon sa krisis sa pagpang-hostage sa miaging Lunes.

Apan labing gipasigarbo ni Natuel ang ilang kahimanan dihang gidayeg kini sa tanang mga negosyante nga nagpadagan og mga hotel, resorts ug mga restawran sa dakbayan sa Lapulapu atol sa usa ka demonstrasyon nga ilang gihimo bahin sa hostage taking crisis sa miaging adlaw.  

Ang mga sakop sa Lapulapu City SWAT Team mipasundayag sa ilang katakus ug kapabilidad sa pagsulbad sa “Hostage Crisis situation” sulod sa usa ka bus sa hawanan sa Lapulapu City Hall diin gihulagway nila ang nahitabo sa tourist bus nga gi-hostage sa usa ka naghuramentadong polis sa Manila sa miaging Lunes.

 Matud pa ni Natu-el , ang SWAT Team sa Lapulapu kompleto sa mga kagamitan ug training alang sa bisan unsang krisis nga mahitabo.

 Gipakita ni Natu-el ngadto ni Mayor Paz Radaza ug sa mga General Manager sa mga dagkong hotel sa dakbayan ang mga kahimanan sa SWAT Team sa Lapulapu nga nagbaton og night vision gaggles, assault rifles, bomb suits, bullet proof vest ug uban pa.

 Matud pa ni Mayor Radaza nga iyang gihatagan og prioridad ang pagkompleto sa mga kagamitan sa SWAT Team nga maoy isakbang sa mga nagkadaiyang krisis sama sa “hostage taking” nga mahitabo.   (BANAT NEWS)