CEBU, Philippines - Giawhag sa konseho sa siyudad sa Sugbu ang mga kompanya sa sigarilyo nga ibutang sa kaha sa ilang produkto ang hulagway sa mga matang sa sakit mugna sa pagpunay og panigarilyo.
Kini aron mahatagan og konkretong pahimangno ang mga konsumidor nga dili magpatuyang og pagyupyop sa sigarilyo.
Si Konsehal Edgardo Labella miingon nga angayan lamang nga aghaton ang mga cigarette companies nga mopakita sa mga nagkadaiyang sakit ngadto sa mga konsumidor.
Kini agi og tuman sa responsibilidad niini ngadto sa ilang mga konsumidor ug sa katilingban pinaagi sa pagbutang sa maong mga hulagway isip pahimangno aron ang uban makalikay nga magkasakit.
Matud pa niini nga mas labing tukma nga mabutang ang pictures sa mga sakit sanglit wala man kaayo epekto ang gibutang nga warning kay dili man usab kini basahon sa mga konsumidor.
Ang mga kaha sa sigarilyong gibaligya sa kamerkaduhan dinhi sa nasud adunay nakabutang o imprinting “Government Warning Cigarette Smoking is Dangerous to Your Health” nga dili gani panumbalingon sa mga manigarilyo.
Lakip sa giingong mga sakit nga makuha sa sigarilyo mao ang kanser sa baga ug atay, kanser sa baba ug tutunlan, makapadali sa pag-atake sa sakit sa kasingkasing ug uban pa.
Ang konsehal nagtuo nga makahinuklog ug makapuypoy sa mga smokers ang makita niining mga pictures ug dako ang posibilidad nga makaaghat kini kanila sa pag-undang sa pagpanigarilyo.
Adunay mga nasud sa Asya nga mibutang sa maong mga hulagway isip pahimangno nga miresulta usab sa pagkunhod sa halin sa maong mga sigarilyo sa ilang mga lugar.
Sa pagkakaron, gawas sa maong warning sa gobiyerno sa mga kaha, gipatas-an sa gobiyerno ang bayad sa buhisan sa maong produkto hinungdan nga misaka ang mga presyo niini apan pabilin gihapon ang pagpanigarilyo sa mga naanad na niini, pipila kanila mga batan-on. (BANAT NEWS)