CEBU, Philippines - Nakasugat og problema ang mga gitudlong mga polis nga deputized agents sa Land Transportation Office gikan sa nagkadaiyang lungsod sa lalawigan sa Sugbu tungod sa giingong dili pagdawat sa ilang mga i-turnover nga dinakpan diha sa district offices sa LTO kay adto lang sa rehiyonal nga buhatan sa LTO-7 dinhi sa dakbayan. Ang hepe sa lalawigan sa Sugbo Sr. Supt. Erson Digal mibutyag nga ang iyang kapolisan midanguyngoy tungod niini kay naghago-hago na sila pagpanakop sa mga abusadong drayber apan layo kaayo ang ilang hatdan niini.
Midugang si Digal nga gawas sa kahago, kalas usab kini sa kwarta ug panahon maoy usa usab sa mga giproblema sa kapolisan sa lalawigan.
Si Digal buot makigkita kang LTO-7 Regional Director Raul Aguilos aron ikonsulta ang problema ug mapangitaan og solusyon.
Sumala pang Digal base sa iyang nasayran nakahatag na og memorandum si Aguilos ngadto sa mga buhatan sa LTO nga dawaton ang mga dinakpan sa kapolisan sa lalawigan kun asa sila mas duol.
Nasayran nga ang kapolisan sa lalawigan sa Sugbo dili palang dugay subling gitugutan sa buhatan sa LTO nga mamahimong deputized agents aron makatabang sa kaluwasan sa mga pasahero batok sa mga abusadong drayber. (BANATNEWS)