Nagkomedyang maghikog nadayunan

CEBU, Philippines - Usa ka pintor sa sakyanan nga nangomedyang maghikog ang nadayunan og kamatay diin siya ulahing nakit-ang nag-ubo nga ang liog gisambilay niini sa duyan sulod sa ilang balay sa sitio VBCA3, barangay Quiot ning dakbayan kagahapon sa kaadlawon.

Ang biktima giila nga si Charlie Jumao-as, 34, ug molupyo sa nahisgutang lugar.

Sa pagresponde ni SPO2 Jerome Java sa Police Station 10 ug sa barangay tanod nga si Milard Ylaya wala nay kinabuhi diha sa sawog si Jumao-as.

Sa imbestigasyon sa kapulisan wala kini mga samad o timailhang gipasipad-an gawas lamang sa marka diha iyang liog mugna sa pagsambilay niini diha sa duyan.

Matud pa sa iyang kapuyo nga si Elsa Clarito hubog si Jumao-as nga nahiuli alas 9 sa kagabhion ug nangomedyang maghikog pinaagi sa pagsab-it sa iyang liog sa duyan.

Apan wala niya kini panumbalinga ug natulog nalang siya samtang nakatulog usab si Jumao-as sa maong kahimtang nga nagluhod ug ang liog nasablay gihapon sa duyan.

Nianang pagkatungang gabii iyaha kining gisusi ug mao ra gihapon ang posisyon niini sa duyan maong iyaha kining giaswat ug gibalhin sa salog.

Ang amahan ni Jumao-as nga si Agripino mao nay mipukaw sa nahauna aron unta pabalhinon og higdaanan apan sa iyang pagpasiga sa suga nakugang nalang kini nga patay na ang anak. (BANATNEWS)