CEBU, Philippines - Gibalhog sa detention cell sa kapolisan sa dakbayan sa Lapulapu ang usa ka polis sa Cebu City Police Office (CCPO) nga nagpabuto sa iyang armas sa miaging Domingo sa buntag sa sitio Kinalumsan, barangay Canjulao, dakbayan sa Lapulapu.
Ang gidakop mao si PO3 Alvin Quimbo, minyo nga nagpuyo sa maong lugar ug nadistino sa Talamban Police Station sa CCPO sa dakbayan sa Sugbo.
Kasong illegal discharge of ammunition ug alarm and scandal ug kasong administratiba ang posibleng ipasaka karong adlawa batok kang Quimbo.
Si PO1 Stanley Las Piñas sa Presinto 3 sa Lapulapu Police Police Office nga nahinabi sa Banat News miingon nga may mga molupyo sa maong dapit nga mitawag kanila ug nangayo og tabang tungod sa pagpanghasi sa usa ka polis.
Dugang pa niya nga sa ilang pasiunang pakisusi ilang nasayran nga gikalalis ni Quimbo ang asawa niini ug dihang giduol sa iyang mga bayaw gipabuthan niya sila sa iyang armas nga kargada.
Wala hinuoy gika-report nga may nasakitan o naigo sa pagpabuto ni Quimbo apan maayong pagkabuslot sa ligid sa sakyanan sa asawa niini nga maoy naigo sa bala hinungdan nga nangayo og ayuda sa kapolisan ang mga residente.
Si SPO3 Jesus Gemenia sa Investigation Detection and Management Bureau (IDMB) nga maoy miimbestigar sa maong kaso nagkanayon nga ilahang pasakaan og kasong kriminal ug administratiba si Quimbo. Gisusi na usab ang report nga giingong hubog kini niadtong tungura.
Sa pakighinabi sa Banat News sa hepe sa kapolisan sa syudad sa Sugbo, Sr. Supt. Patrocinio Comendador mibutyag nga dili sila manginlabot kun maghisgot sa criminal charges batok sa iyang sakop tungod kay sa Lapulapu man kini nahitabo.
Samtang kabahin sa administrative charges hurisdiksyon na kini sa Internal Affairs Service (IAS) ug magpaabot nalang siya kun unsay desisyon sa maong buhatan aron maoy iyang tamdan pag-aksyon batok kang Quimbo. (BANAT)