Gipukpok og ice pick abaga sa lalaki nabuslot

CEBU, Philippines - Nabuslot ang abaga sa usa ka 29, anyos nga lalaki human kini duslaka og ice pick sa iyang higala ug silingan sa sitio Ermita Beach, sa barangay Ermita, ning dakbayan sa Sugbo kagahapon sa kaadlawon.

Ang biktima giila nga si Gilbert Aniana Diaz, 29, nga taga Ermita Beach, samtang ang suspetsado nailhan lang sa alyas nga Tawing, higala ug siligan sa biktima.

Ang biktima kinsa nagtibi nga mitug-an sa kapolisan nagkanayon nga naglakaw siya kauban sa iyang usa ka amigo nga si Janjan Villegas, dihang kalit lang mipatim-aw ang suspetsado ug sa walay hinungdan gipukpok sa ice pick ang iyang abaga.

Wala kaayo makasirit ang dugo kay gamay kaayo ang samad agi sa mitaop nga ice pick sa abaga sa biktima.

Gihatod dayon kini ngadto sa Cebu City Medical Center samtang ang suspetsado gipangita pa karon sa kapolisan. (BANAT)