Task force batok kriminal gitukod

CEBU, Philippines - Gipirmahan na ni Gobernador Gwen Garcia ang usa ka Executive Order nga nag-umol sa Cebu Provincial Inter-Agency Task Force Against Criminality (CPIATFAC) nga gitahasan sa paggukod sa mga kriminal sa kalungsoran ilabina sa mga gun for hire ug ang mga magmotorsiklong armadong mga tawo.

Sumala pa ni Garcia nga siya maoy chairman sa bag-ong naumol nga task force (TF) nga gilangkoban sa mga regional director sa Police Regional Office (PRO)-7, National Bureau of Investigation (NBI)-7, Philippine Drug Enforcement Agency (PDEA), Regional State Prosecutor (RSP), Department of Social Welfare and Development (DSWD), mga director sa PNP sa dakbayan sa Sugbo, Mandaue ug sa Lapu-lapu, Regional Intelligence Division (RIID) ug Criminal Intelligence and Detection Group (CIDG).

Ang mga komitiba usab ning maong TF gilangkoban sa reward and incentives, prosecution and legal committee, Enforcement and Investigaion, ug Public Relation and Specific projects.

Matud pa ni Garcia nga ang pundong gastuhon sa maong TF abagahon sa kagamhanan sa lalawigan sa Sugbo gikan sa Peace and Order fund sa Kapitolyo apan sabotan pa sa mga sakop niini kun pila gyud ang kanahanglanong pundo nga gamiton niini.

Ang gobernadora nagkanayon nga wala mahanaw ang unang naumol nga Provincial Loss Fire Arms Task Force tungod kay nahilakip na kini sa bag-ong naumol nga TF.

Si Garcia midugang nga ang maong TF dili lamang kutob sa pagdakop, kun dili hangtod na sa pag-file sa kaso ug masilotan ang mga kriminal.

Sa miaging adlaw gipahigayon sa Kapitolyo ang labing unang meeting sa mga sakop sa maong TF nga gipangulohan ni Garcia uban nila ni PRO-7 Regional Director, Chief Supt. Ager Ontog Jr. ug NBI-7 Regional Eirector Edward Villarta.

Usa sa gituki sa gobernador ug mga kaubanan mao ang pagpatuman sa curfew sa tibuok lalawigan sa Sugbo.

Midugang ang gobernadora nga lakip usab sa tahas sa maong TF mao ang paghatag og reward ug paghatag og protection sa mga testigos batok sa mga kriminal. (BANAT)