CEBU, Philippines - Gitakdang patas-an ang honorarium sa mga barangay tanod sa dakbayan sa Mandaue tungod sa kadako nila og papel isip kaabag sa kapolisan sa pagpatunhay sa kalinaw ug kahusay sa maong lugar, matud pa ni Mayor Jonas Cortes.
Atubangan sa mga sakop sa media, si Cortes nagkanayon nga kuwang kaayo og polis ang Mandaue busa ang tanod maoy bugtong katabang sa kapolisan aron masumpo ang krimen nga moduyog usab sa pagdagsang sa katawhan ug sa pagsaka sa ekonomiya sa usa ka highly urbanized city(HUC) sama sa Mandaue.
Gumikan niini, nagkanayon ang mayor nga dili siya magpanuko sa pagpasaka usab sa honorarium sa mga tanod tungod sa kadako sa risgo nilang giatubang gumikan sa tahas nga gipatong kanila diha sa barangay.
Matud pa ni Cortes nga ang gidaghanon sa polis sa Mandaue nga usa ka HUC, susama ra sa gidaghanon sa kapolisan sa usa ka first class city.
Busa gusto siyang himuong Eco-Warden ang mga tanod sa dakbayan, apan gawas sa pagmintenar sa kalinaw ug kahusay, manakop usab sila niadtong mga malapason sa balaod bahin sa hustong paglabay sa basura.
Manakop usab sila sa mga malapason sa balaod sa curfew, matud pa ni Cortes.
Hinuon paestokadahan pa ni Cortes ang maong sugyot sa mga konsehal sa dakbayan. - Bong Soriano ug Romeo T. Limpangog (BANAT NEWS)