Municipal engineer sa Mingla' gipasuspenso

CEBU, Philippines - Ang Ombudsman Visayas miluwat og kamanduan sa pagsuspenso sa municipal engineer sa lungsod sa Minglanilla nga si Nestor Sotes sulod sa tulo ka buwan tungod sa simple neglect of duty kini human sa gidusong reklamo sa kanhi mayor sa lungsod nga si Marlo Hedwigo Cañada.

Ang maong desisyon giluwatan sa buhatan sa Ombudsman niadtong Septiyembre 4, 2009 apan nadawat ni Cañada ang kopya sa maong desisyon niadto nang buwan sa Agusto niining tuiga.

Niadtong tuig 2005, si Cañada mi-request sa municipal treasurer nga si Wilfredo Alidon nga i-release ang iyang terminal leave pay sa iyang pagserbisyo sulod sa siyam ka tuig nga pagkakonsehal sa lungsod sukad niadtong Hulyo 1, 1992- Hunyo 30, 2001 ug sa iyang pagka-mayor sukad niadtong Hulyo 1, 2001 hangtud Hunyo 30, 2004.

Si Alidon nangayo sa kanhi mayor sa pagsumitir og money and property accountability clearance ngadto sa Human Resource Management Office (HRMO) nga si Ratchill Anor apan si Anor mitambag sa kanhi mayor nga mosumitir sa samang rekisitos ngadto sa Treasurer’s Office.

Ang tanang mga rekisitos nakompleto ni Cañada apan wala gihapon i-release ang iyang terminal leave pay hinungdan nga niadtong Oktobre 18, 2005 miduso na siya og reklamo ngadto sa buhatan sa Ombudsman.

Niadtong Nobiyembre 16, 2005 dunay gipahigayong conference diha sa buhatan sa Ombudsman kabahin sa maong kaso diin gikasabutan nga si Cañada pasumitiron og accomplishment report sa iyang mga proyekto dihang siya pa maoy namunoan sa Minglanilla aron maisyuhan siya og accountability clearance.

Niadtong buwan sa Disyembre 2005 ug niadtong Marso 15, 2006 si Alidon mipahibawo sa kanhi mayor nga sa unom niya niadtong proyekto base sa accomplishment report nga iyang gisumitir usa lang ang nasutang nakompleto ug kinahanglan nga masusi una sa municipal engineer ang maong mga proyekto.

Bisan og nakompleto na sa pagsumitir ni Cañada ang tanang mga rekisitos nga gipangayo wala gihapon i-release ang iyang terminal leave pay diin ang iyang final demand niini niadtong Hulyo 13, 2006.

Si Alidon sa tubag sa iyang tubag sa reklamo sa kanhi mayor nagkanayon nga wala dayon sila makahimo og lakang sa hangyo ni Cañada tungod kay wala sila makadawat og report gikan sa municipal engineer, sa lima ka mga kapitan sa barangay nga nakabenepisyo sa proyekto niadto sa kanhi mayor ug sa buhatan sa Ombudsman.

Base sa gihimong imbestigasyon sa buhatan sa Ombudsman nasuta nga ang proyekto sa kanhi mayor naimplementar niadtong tuig 2003 apan niadtong Marso 6, 2006 lang gi-inspection ni Sotes.

Niadtong Disyembre 28, 2005 gi-forward ni Alidon ngadto sa buhatan ni Sotes ang accomplishment report nga gisumitir ni Cañada.

Ang buhatan sa Ombudsman natahap kung duna bay nahitabo nga inspection niadtong Marso 6, 2006.

Duha sa mga proyekto ni Cañada mao ang reservoirs diha sa barangay Camp 7 ug Guindarohan.

Nasuta sa buhatan sa Ombudsman nga si Sotes napakyas sa pagtuman sa iyang trabaho hinungdan nga midesisyon ang Ombudsman nga awhagon ang municipal mayor sa pagpasuspenso kang Sotes.

Kagahapon sa buntag ang mga tigbalita nanawag sa buhatan sa mayor sa lungsod aron makuhaan kini og pamahayag kabahin sa isyu apan ang secretary niining si Claudith Rubillos maoy nakatubag ug nagkanayon nga niadtong Agosto 16, 2010 pa giimplementar ang suspensyon ni Sotes ug makabalik kini sa iyang trabaho karong Nobiyembre 16, 2010.  – BANAT NEWS