CEBU, Philippines - Gikatakdang makigtagbo ang mga sakop sa Cebu Coalition for Food Security (CCFS) kang Kalihim Proceso Alcala sa Department of Agriculture karong Agosto 20 aron hisgutan ang bahin sa Sustainable Farming System (SFS).
Gipaabot nga motambong sa maong tigom ang nagkadaiyang non-government organization (NGO), mga tinun-an ug mga mag-uuma.
Usa sa tuyo sa mga opisyal sa CCFS sa pagpakigtagbo kang Alcala mao ang paghangyo niini nga hingpiton gyud ang pagpatuman sa organic farming o ang natural nga paagi sa pagpanguma aron makabaton og abunda nga ani ang mga mag-uuma ug luwas usab nga mga pagkaon gikan sa kaumahan.
Matud pa ni Jovie Cadungog, sakop sa transition team ni Alcala, nga nagkadaghan karon ang mga mag-uuma busa gikinahanglan usab nila ang dugang mga impormasyon alang sa hustong sistema sa pagpanguma.
Dugang pa ni Cadungog nga lakip usab nga edukahon, mao ang mga konsumidor.
Sumala pa niya nga dili angay nga permihon ang pagpangaon sa mga fastfood nga mga kan-anan gumikan sa mga pagkaon nga baligya diha nga puno kaayo sa mga preservative.
Matud pa niya nga kinahanglang likayan ang pagpunay og kaon sa mga makaon nga puno sa preservative aron mamintinar sa katawhan ang maayong panglawas.
Ang CCFS miawhag usab sa DA nga maoy mo-edukar pag-ayo sa mga mag-uuma aron mobalik na kini sa paggamit og mga abuno nga gikan sa lata nga mga sagbot ug ingon man sa hugaw sa mga kahayopan.
Kini aron mobalik usab ang natural nga katambok sa ilang kaumahan gikan sa pagkasawot niini gumikan sa pagpatuyang og gamit sa mga abuno nga komersyal nga hilabihan sa kaparat nga maoy nakawagtang sa natural nga katambok sa yuta.
Nasayran gikan sa DA nga nagkuwang kini karon og mga technician sa panguma busa gikinahanglan nila ang koordinasyon sa ubang ahensiya sa gobyerno lakip na ang pipila ka mga NGO. – BANAT NEWS