Nag-date gipareglahan

CEBU, Philippines - Nalungag ang bukobuko sa usa ka 19-anyos nga lalaki kinsa biktima sa pagpamusil dihang gipareglahan sa grupo sa wala hiilhing mga lalaki alas 11 pasado ang takna sa miaging gabii samtang kuyog sa higalang babaye sa ilawom sa Marcelo Fernan Bridge sa habig sa barangay Pusok, dakbayan sa Lapulapu.

Ang biktima mao si Joseph Booc, 19, nagpuyo sa maong dapit ug ang nagpusil mao ang grupo sa wala hiilhing mga batan-ong lalaki nga gituohang mga sakop sa gang o fraternity sa maong dapit.

Si PO3 Dioscoro Arong sa homicide section sa kapolisan sa maong dakbayan miingon nga nagkukabildo ang biktima sa iyang higala samtang nanglingkod dihang kalit lang mitumaw ang gikatahapan ug giibtan kini og kutsilyo.

Matud pa ni Arong nga unang gipadagan ni Booc ang higala niining babaye apan sa iyang pagsunod niini kalit kining gipusil ug naigo ang bukobuko.

Ang grupo daling misibat pahilayo sa maong dapit samtang gitabang sa mga tawo pagdala sa Opon District Hospital sa Carajay, Gun-ob si Booc.  – BANAT NEWS