CEBU, Philippines - Si Lapulapu City Administrator Elena Caballes mibahad nga pangkonpiskahon ang mga isdang butete kun kini ibaligya sa merkado publiko sa dakbayan sa Lapulapu.
Matud pa ni Caballes ilang gidili ang pagpamaligya sa mga isdang makahilo sama sa butete, boriring ug uban pang matang sa isda nga makalanag.
Gumikan niini, dakpon sa mga operatiba sa merkado publiko ang mga tindera og isda nga mamaligya og makalanag nga isda ug posibleng i-ban sa merkado.
Ang maong lakang gihimo sa kadagkoan sa merkado gumikan sa mga panghitabo nga adunay mga residente nga nangalanag sa maong matang sa mga isda ug adunay uban nga nangamatay.
Ulahing nahitabo mao ang gikan sa barangay Cabutungan, Santander diin duha ang namatay ug walo ang nalandig sa tambalanan gumikan sa pagkaon og butete.
Ang dakbayan sa Lapulapu lakip sa mga dapit nga kasagaran sa panginabuhian mao ang panagat. Gumikan niini, gipasidan-an ni Caballes ang mga residente sa dakbayan sa Lapulapu nga dili mokaon sa maong matang sa isda.
Sa laing bahin, si Gob. Gwendolyn Garcia misaad nga mohatag siya og hinabang ngadto sa pamilya sa duha ka tawo nga namatay sa pagkahilo sa butete ug sa walo nga nalandig sa tambalanan tungod gihapon sa maong isda.
Mohatag og P5 mil ngadto sa pamilya sa matag usa sa duha ka mga biktima nga namatay nga mao sila si Rolandio Tano alyas Romy, 48, mananagat ug Alejandro Cuerpo, 51, barangay tanod ug pulos taga barangay Cabutungan, lungsod sa Santander.
Abagahon usab ang tanang mga galastohan sa ospital sa mga nalandig sa Vicente Sotto Medical Center nga sila si Irene Tano, 19, anak sa usa sa namatay ug tulo ka buwang mabdos; Luigi Tano, 13, anak gihapon ni Tano; Salvador Base, 48 ug apil na ang amahan nga si Baldomero Base, 69, anak niini nga sila si Raymund Base, 16, ug Algie Cuerpo, 28, kabanay sa namatay nga si Cuerpo.
Andam usab mohatag og P5 milyones ngadto sa 3 mil ka mga pamilyang nabiktima sa sunog sa barangay T. Padilla, siyudad sa Sugbo. - Bong Soriano ug Chester Abadilla (BANAT NEWS)