CEBU, Philippines - Pormal nga gilusad kagahapon sa buntag ang Malubog Watershed Conservation Project sa Cebu Energy Development Corporation (CEDC) diha sa barangay General Climaco, dakbayan sa Toledo.
Usa sa kalihukan kagahapon mao ang paghatag og mga certificate of stewards sa 30 ka mga mag-uumang patamnon og mga fruit bearing trees sa 100 ektaryang luna palibot sa Malubog Watershed.
Base sa nahipos nga kasayoran sa lokal nga kagamhanan sa siyudad kaniadto adunay 30 milyones ka ektaryang virgin forest ang nasud apan katunga nalang niini ang nabilin.
Si Bise Mayor Dydee Zambo sa pakighinabi niini sa mga tigbalita kagahapon nagkanayon nga ang CEDC maoy mohatag og mga binhi ngadto sa mga mag-uuma aron ilahang itanom.
Ang mga fruit bearings trees gilangkuban kini sa Kasoy, Nangka, Avocado ug uban pa gawas sa Manga, ug samtang sila magpaabot nga mamunga patamnon una sila og rootcrops sama sa kamote alang sa ilang panginabuhian.
Ang maong proyekto gitambayayongan sa CEDC ug Toledo Power ingon man sa Department of Environment and Natural Resources (DENR) ug ang kagamhanan sa siyudad.
Diha sa Malubog Watershed nahimutang ang dam nga dunay gilapdon nga 100 ka ektarya nga gibuhat kini kaniadto sa Atlas Mining Corporation aron dunay suplay sa tubig nga magamit alang sa ilang operasyon.
Gipasabot ni Zambo nga ang tubig diha sa dam dili mainom apan magamit kini sa mga residente diha sa lugar sa pagpamubo sa mga tanom ug pagpanghugas apan dunay gihimong pagtuon ang Aqua Atlas Subsidiary sa Department Copper Corp. nga moabot ang panahon nga duna silay himuong lakang nga mahimong potable ang tubig sa Malubog dam.
Usa sa gitutokan sa lokal nga kagamhanan sa siyudad mao ang pagpasemento sa karsada sa Malubog.
Si Jesus Alcordo, presidente sa CEDC nagkanayon kagahapon nga ang CEDC usa ka joint venture sa Metro Bank Group ug sa Aboitiz Power nga bisan asa sila mag-operate og mga proyekto kanunay silang maghimo og mga proyekto alang sa kaayohan sa komunidad.
Usa sa ilang proyekto mao ang “Kabilin” usa ka Social Action Program nga nagsentro sa reforestation aron sa pagpreserba sa mga forest land ug water reservation. (BANATNEWS)