CEBU, Philippines - Walo ka mga balay sa sitio Superior, barangay Looc, dakbayan sa Mandaue gitakdang ipaguba sa kagamhanan sa dakbayan gumikan sa daghang mga kalapasan niini, matud pa ni City Administrator Briccio Boholst kagahapon.
Sa pakighinabi sa Banat News, gibutyag ni Boholst nga pipila sa mga kalapasan sa mga tag-iya sa maong mga balay mao ang ka-walay electrical permit niini, nakabara sa imburnal, ug uban pa .
Gumikan niini gipasidan-an sila ni Boholst nga mangandam na silang daan apan sa samang higayon giawhag niya ang maong mga tag-iya nga mas labing maayo nga sila nalay moguba niini aron mahipos pa nila ang mga materyales niini.
Kini tungod kay kun ang demolition team pa sa City Hall maoy moguba malagmit daghan kaayong materyales nga madaot ug dili na magamit sa tag-iya.
Apan kun magdumili gyud ang maong mga tag-iya sa pagguba sa ilang mga balay, mapugos ang demolition team sa paglihok.
Tungod kay nahimutang man ang maong mga balay sa likod sa buhatan sa Land Transportation Office (LTO) nalipay kaayo ang mga kawani sa maong ahensya sa kagamhanan kay mahawan na ang ilang palibot.
Nasayran nga anaa ra mag-opisina sa maong mga kabalayan ang mga mini nga kompaniya sa insurance kinsa mamiktima sa mga drayber nga may transaksyon sa LTO. (BANATNEWS)