3 managsuon nabuthan patay

CEBU, Philippines - Tulo ka managsuong menor de edad ang namatay human mabuthi og improvised explosive device (IED) kagahapon sa buntag diha sa sitio Sto. Niño sa barangay Pitogo, lungsod sa La Libertad, Negros Oriental.

Sa gipadalang text message dinhi sa Banat News ni Sr. Supt. Agusto Marquez, director sa Negros Oriental Provincial Police Office ang mga batang nakalas mao sila si Judelyn Binoy, 6, Marvin Binoy Jr., 15, ug Sherlyn Binoy,17.

Sumala pa ni Marquez nga nanglakaw ang mga ginikanan sa mga bata ug nabilin ang mga bata diha sa ilang balay nga nagduwa dihang nahitabo ang pagbuto sa IED.

“(The) Explosion has indicators of an IED as no grenade shrapnel was found,” sumala pa sa text ni Marquez.

Base sa impormasyong gihatag sa tigbalitang si Florence Baisa, ang news director sa DYAM-Energy FM nga gikahinabi sa Banat News ug didto sa lugar adunay usa sa managsuon ang naluwas.

Ang nasalbar mao si Roselyn , 8, human kini miapas sa ilang amahan ug inahan nga sila si Marvin Sr., 40, ug Josie, 38, nga nagtugway sa ilang mga kanding dili layo sa ilang balay.

Matud usab sa taho ni Baisa nga ang kapitan sa maong barangay mao nay mipahibalo ngadto sa kapolisan kabahin sa insidente maong miadto ang kapolisan pinangulohan sa hepe nga si Senior Inspector Errol Besario. Gihulagway nga ang barangay Pitogo bukirang barangay kini sa La Libertad ug duol na sa utlanan sa Negros Occidental ug may gilay-on nga 30 ka kilometro gikan sa lungsod.

Matud usab sa report nga pag-abot sa mga polis limpiyo na ang crime scene ug ang mga nangamatay wala na diha sa ilang balay.

Nakita sa mga polis ang mga buslot sa balay sa kaldero sa pamilyang Binoy nga gituohang agi sa pagbuto sa maong bomba.

Gawas niini ang 8-anyos nga si Roselyn naabtan sa mga polis diha sa ilang balay tungod kay gibilin kini sa iyang mga ginikanan nga nanglakaw maong mao nalang kini ang ilahang gisukit-sukit.

Si Marquez mibutyag nga ang maong lugar usa sa mga lugar nga gihugpaan og maayo sa mga rebeldeng New Peoples Army ug gisusi na nila kun may kalambigitan ba niini ang maong grupo.

Kini samtang ilaha pang gitino kun diin gikan o asa nakuha sa mga bata ang maong bomba.  – BANAT NEWS