Dunay pundo ang Brgy., SK elections-DILG-7

CEBU, Philippines - Gisupak sa Department of Interior on Local Government (DILG-7) ang giduso nga balaudnon ni Cebu City North District Kongresista Rachelle Margarette ‘Cutie’ Del Mar nga i-postpone ang barangay elections ngadto sa sunod nga tuig.

Matud pa ni DILG-7 regional director Pedro Noval Jr. nga dili makababag sa pagpatuman sa barangay elections ang kakulang sa pundo sa national government.

Si Noval miingon nga bisan pa og P2 bilyones ang kinahanglanon sa synchronized barangay ug Sangguniang Kabataan elections nga gikatakda karong bulan sa Oktubre madayon gyud kini tungod kay aduna nay gitaganang pundo ang national government alang niining election.

Matud pa sa director sa DILG nga wala siya’y nakitang kalainan sa pag-uswag sa maong election sanglit mao ra gihapon ang gidak-on sa gastuhon nga gamiton kun sa sunod tuig kini ipahigayon.

Dugang pa ni Noval nga sa ilang pagpahigayon og pakisusi iyang nahibaw-an nga kasagaran sa mga tawo sa barangay dinhi sa lalawigan sa Sugbu buot na nga may election gyud nga mahitabo.

Sumala pa niya nga ang katawhan nga ilang napangutana pulos misaway sa ilang mga barangay officials ug gusto na nila silang mahulipan sa ilang mga pwesto.

Gikatahong kining maong mga barangay officials walay nahimong kaayohan alang sa mga konstituwente ug nahimo pa hinuong mga diktador sa ilang mga ginsakupan imbes nga moserbisyo subay sa ilang gipanaad atol sa pagpangampanya.

Samtang adunay dili mga kompirmadong report nga gituohang ang pag-uswag sa piniliay sa mga barangay officials maoy ‘bayad sa utang’ nga kabubut-on sa mga kongresista ngadto sa mga barangay officials nunot sa pagtabang kanila atol sa nakalabay’ng eleksyon.

Ang mga barangay officials nga kasamtangang naglingkod karon sa pwesto kun dili mahulipan magpadayon sa pagdawat sa ilang mga honorariums ug makakolekta og mga pundo alang sa ilang mga proyekto sulod sa usa pa ka tuig o ba kaha kun hangtud kanus-a nga mahinayon ang eleksyon.

Mismong si South District Kongresista Tomas Osmeña mipadayag sa pagsupak nga iuktaba ang piniliay sa barangay tungod gihapon sa susamang rason nga daghang mga barangay officials nga walay gamit ug dili gani makamao modumala sa ilang mga lugar. (BANATNEWS)