Gwen supak nga usbon ang MCIAA Charter

CEBU, Philippines - Supak si Gob. Gwendolyn Garcia nga usbon ang charter sa Mactan Cebu International Airport Authority (MCIAA) aron lamang mahatagan og katumanan ang gitinguha ni Lapu-lapu City Mayor Paz Radaza nga may representasyon ang siyudad sa Lapu-lapu sa MCIAA Board tungod sa rason nga ang airport nahimutang sa ilang dakbayan.

Matud pa ni Garcia nga mahimong lisod ug makuti ang gipangayo sa mga opisyales sa siyudad sa Lapu-lapu sanglit magkinahanglan og pagtugot gikan sa Kongreso ang bisan unsang pag-amendar sa charter sa MCIAA.

Si Garcia nagkanayon nga wala siyay pagsupak nga may residente gikan sa dakbayan nga makalingkod isip miyembro sa board ug maoy morepresentar sa kagamhanang lokal sa dakbayan.

Apan iyang gitataw nga mahimong may katumanan ang gihangyo ni Radaza nga dili na gikinahanglan pang usbon ang charter sa MCIAA pinaagi sa pagpili og usa sa tulo ka mga private sector nga lumad gyud nga taga Lapu-lapu.

Gipahibawo sa gobernadora nga ang representasyon sa MCIAA board ni Bobit Avila sa private sector matapos karon sunod nga bulan ug posibleng mao na kini ang kahigayonan nga matuman ang gitinguha sa siyudad sa Lapu-lapu.

Nabutang ning bag-ohay lang sa kontrobersya ang maong board gumikan sa pagkwestyon sa mga kawani sa tunga sa milyon nga benepisyo isip pabalon sa miretirong si Department of Tourism regional director Patria Aurora Roa nga sakop sa board.

Ang Ombudsman mipasalig nga adunay himuong imbestigasyon sa maong isyu aron pagklaro sa legalidad niini. – BANAT NEWS