CEBU, Philippines - Gumikan sa pagkatulog sa usa ka drayber samtang nagmaneho, natumba ang Ceres Bus nga iyang gidrayban didto sa barangay Tangbo, lungsod sa Samboan kagahapon sa alas 3:00 sa hapon.
Ang drayber nga si Britesam Quebedo, hingkod, nga taga barangay Basak ning syudad sa Sugbu, ug ang iyang konduktor nga wala hiilhi sa kapolisan pulos naangol.
Matud pa sa pasiunang imbestigasyon sa Samboan Police Station, nga ang driver sa maong bus nga adunay plate number nga GWK-681 nakatulog samtang nagpadagan sa sakyanan nga maoy hinungdan sa pagkatumba niini sa usa ka bung-aw nga may 3 ngadto sa 4 ka metros ang giladmon.
Nagusbat pag-ayo ang tuong bahin sa maong sakyanan ug maayo nalang kay walay mga pasaherong nagsakay sa maong disgrasya.
Gihatod dayon ang duha ngadto sa tambalanan. – BANAT NEWS