Tourist Police Unit gitukod sa Lapulapu

CEBU, Philippines - Ang bag-ong gitukod nga Tourist Police Unit (TPU) sa dakbayan sa Lapulapu andam na sa pagbantay sa mga langyaw ug lokal nga turista nga mobisita sa Isla sa Mactan.

Kini ang gibutyag ni P/Chief Insp. Percibal Zorilla, hepe sa TPU sa Lapulapu human sila ipresentar ni Mayor Paz Radaza ngadto sa mga sakop sa media.

Matud pa ni Radaza nga ang TPU maoy manalipod sa mga turista ug sa mga negosyanteng langyaw nga mobisita ug motukod og negosyo sa dakbayan sa Lapulapu.

Ang TPU may 19 ka mga miyembro nga gidestino sa tulo ka mga barangay sa dakbayan sa Lapulapu nga mao ang   Marigondon, Maribago ug sa Punta Engano.

Ang TPU may kaugalingon usab nga hepe, luyo-luyong hepe, nga maoy magsuperbisar sa ilang mga kalihukan. Misaad si Radaza nga tukoran niya og edipisyo ang TPU sa mga barangay nga nahimutangan niini. – BANAT NEWS