CEBU, Philippines - Kasamtangang anaa sa Sports Complex sa Barangay Camputhaw ang mga biktima sa sunog didto sa sitio Care, Purok 8, sa barangay Camputhaw ning dakbayan sa Sugbo niadtong Lunes sa kaadlawon.
Matud pa sa barangay secretary Jay Clark Tampus nga nakadawat sila og hinabang gikan sa buhatan ni Kongresista Cutie del Mar , uban usab sa Emergency Management Office sa dakbayan sa Sugbo ug sa mga nagkadaiyang non-government organizations.
Hinuon ang kagamhanan sa siyudad sa Sugbo mihatag na og pasiunang ayuda sa mga biktima pinaagi sa Department of Social Welfare and Services.
Ang maong departamento nangapud-apod og mga gamit sa kusina, banig, habol, bugas ug mga linatang pagkaon.
Samtang si Mayor Michael Rama mibutyag nga makigtagbo siya kang Konsehal Rodrigo Abellanosa kinsa maoy tsirman sa committee on social services aron matun-an ang uban pang importanteng panginahanglanon sa 60 ka mga pamilya nga maoy apiktado sa maong sunog.
Giingong ang maong sunog nagsugod sa panimalay ni Nelsa Norca sa maong lugar.
Gibana-bana nga mokabat sa P2 milyones ang kadaot sa maong sunog ug maayo nalang nga walay naangol ug kinabuhing nakalas.
Nasayran sa Banat News nga kasagaran sa mga biktima nag-abang lang sa yuta nga ilang gipuy-an ug muhangyo sila sa tag-iya sa yuta nga makapuyo sila og balik sa maong lugar.
Usa sa ilang gikabalak-an karon mao ang nagkalainlaing balatian nga malagmit mutakboy kanila ilabi na sa ilang gagmay nga mga anak gumikan ning panahon sa tinguwan. – BANAT NEWS