Midwife gireklamo sa CHR

CEBU, Philippines – Gipasakaan og reklmao sa usa ka inahan ang usa ka midwife sa lungsod sa Barili ngadto sa Commission on Human Rights-7 tungod kay mao kini gibasol nga namatay ang iyang ipanganakay nga bata.

            Ang gireklamong midwife mao si Jessica Samonte, ang barangay midwife sa barangay health center sa barangay Cabcaban lungsod sa Barili.       

            Si Leonisa Marata Barcoma, 29, residente sa sitio Batugag Uwak, barangay Cabcaban sa samang lungsod miduso og reklamo ngadto kang CHR-7 regional director Alejandro Alonso Jr. tungod sa pagtuong may kalapasang nahimo ang maong midwife maong namatay ang iyang anak.

            Si Barcoma nagkanayon sa iyang sinumpaang pamahayag nga niadtong mga alas 8:00 sa gabii sa Hunyo 17 ning tuiga nagbati siya ug gidala siya sa barangay health center, gitabang ni Samonte apan gipadala siya niini sa Barili District Hospital tungod kay migawas na ang kamot sa bata.       

            Apan pag-abot sa maong tambalanan ang doktor mirekomendar nga ilahos nalang kini pagdala sa Vicente Sotto Memorial Medical Center sa dakbayan sa Sugbu tungod kay delikado kaayo ang kahimtang niini.

            Sumala pa nga gikarga siya sa ambulansya uban ang iyang bana nga si Roberto, si Samonte ug iyang ig-agaw nga si Anna Liza apan sa pag-abot sa utlanan sa barangay Cabancalan giingong mikanaog si Samonte kay mopauli.

            Sumala pa niya nga mirason ra si Samonte nga paigo na ang referral letter nga gipirmahan sa doktor sa Barili District Hospital nga ihatag sa driver sa ambulansiya.

            Pag-abot nila sa VSMMC mga alas 2:00 na sa kaadlawon girekomendar nga ipailawom siya sa cesarean operation mga alas 7:00 sa buntag sa Hunyo 18 apan sa wala pa operahi namatay na ang iyang bata.

            Nagtuo si Barcoma nga kun wala pa siya biyai sa widwife hayan dali unta siyang maatiman sa mga doktor sa Vicente Sotto Memorial Medical Center ug dili unta mamatay ang iyang anak.

            Sa pakighinabi sa Banat News, si Samonte mipadayag nga andam siyang moatubang sa maong reklamo ug magpaabot lamang siya sa suwat sa CHR nga magpatawag kaniya.

            Subling gipanghimakak ni Samonte ang pasangil ni Barcoma nga iyang gibiyaan ang pasyente sa ambulansiya nga nagdagan paingon sa Vicente Sotto Hospital.

            Iyang giklaro nga wala niya balibari si Barcoma sa pagsulod sa barangay health center, gani iya pa kining gihatud ngadto sa Barili District Hospital.

            Gipasabot usab ni Samonte nga ang iyang responsibilidad sa pasyente kutob ra sa district hospital sanglit dili man siya empleyado sa hospital.

            Gitumbok niini nga misakay lamang siya sa ambulansiya uban ang pasyente kay ang multicab sa barangay gigamit sa bana ni Barcoma sa pagkuha og kwarta ug magpaabot ra sa eskina sa barangay Cabcaban hinungdan sa pag-abot sa maong lugar mikanaug siya ug nipuli kaniya sa pagsakay ang bana sa reklamante.

            Gipanghimakak usab ni Samonte nga gihangyo siya ni Barcoma nga kuyugan siya hangtud sa VSMMC kay kuyaw kaayo ang kahimtang niini ug nitumbok pa nga mahimo niyang saksi ang ig-agaw ni Barcoma nga si Anna Liza Marata. (BANAT NEWS)