CEBU, Philippines - Patay’ng lawas sa duha ka lalaki ang napalgang naglutawlutaw sa kadagatan sa managlahing dapit sa dakbayan sa Lapulapu.
Ang unang patay’ng lawas napalgan diha sa baybayon sa Ibo alas 6:30 kagahapon sa buntag nga nailhan nga si Venerando Igot Egonia, 55, taga sitio Matumbo sa barangay Pusok sa maong dakbayan.
Si PO1 Maximo Villagonzalo Jr. sa Homicide Section mitug-an nga sayong namana og isda si Egonia base sa pamahayag sa pag-umangkon niini.
Samtang mga alas 8:30 kagahapon sa buntag laing patay’ng lawas ang napalgan sa barangay Looc nga giilang si Conrado Alburo, 47, nga may deperensya sa pangisip.
Usa ka Bobby Potot residente sa maong dapit maoy miila kang Alburo sanglit ilaha kini sinagop. Giingong may nakakita niining naligo sa dagat apan pipila ka gutlo ang milabay naglutaw nalang kini sa dagat nga nagbuwa ang baba.
Sa pakisusi sa kapolisan walay foul play nga nakita sa kalawasan ni Alburo diin gidudahan kini nga nalumos atol sa iyang pagkaligo sa dagat. (BANAT NEWS)