CEBU, Philippines - Natangkugo ang usa ka drayber dihang gipusil kini sa wala hiilhing kriminal didto sa sitio Lahing-lahing, barangay Mabolo, ning dakbayan sa Sugbo sa miaging gabii.
Ang biktima nailhan nga si Nathaniel Billones, 30, taga Lahing-lahing ug drayber sa usa ka jeep nga pasaheroan.
Si PO1 Nilo Aventurado sa Mabolo Police Station mibutyag sa Banat News nga ang biktima kauban ni Arvin Enoc nga iyang amigo, naghatod kang Kristelle Mae B. Albacete nga tag-iya sa jeep nga gidrayban sa biktima ngadto sa grahian.
Apan pagpauli niini nga nag-inusara nalang mitungha ang grupo sa wala hiilhing mga tawo nga mipusil kaniya.
Nasabak ang iyang tangkugo sa usa ka bala sa wala hiilhing kalibre sa armas ug gihatod dayon siya sa Cebu City Medical Center samtang gipangita pa sa kapolisan ang kriminal. – BANAT NEWS