CEBU, Philippines - Human sunoga ang tindahan, panimalay na usab sa igsuon sa tulo ka suspetsadong mipatay og managhigala niadtong milabay’ng semana ang gisunog diha sa sitio Torril sa barangay Canjulao dakbayan sa Lapulapu sa milabay’ng gabii.
Ang nasunogan mao si Vivian Pebida Pahugot, residente sa maong dapit ug igsuon sa tulo ka mga suspetsado nga managsuong sila si Pedro Jr., Pedro III ug Patricio Pebida.
Ang tulo maoy gitumbok nga mipusil ug midakdak og bato sa ulo sa managhigalang sila si Rapunsil Dungog ug Paul Dico sa milabay’ng petsa 11 ning bulana.
Sa pasiunang imbestigasyon ni SFO1 Atilano Berido ug FO1 Climaco Salisid sa Lapulapu Fire, nagsugod ang kalayo sa kusina ug mikatap dayon sa tibuok balay alas-10:45 sa milabay’ng gabii ug giisa sa 1st alarm ug midanyos og P100 mil.
Niadtong Hunyo 17, ang tindahan sa amahan ni Pahugot nga si Pedro Pebida Sr. gisunog usab.
Matud pa ni Pebida Sr. nga nagduda siyang may kalambigitan ang pagsunog sa iyang tindahan ug sa pagsunog sa balay sa iyang anak sa krimeng nabuhat sa iyang tulo ka mga anak gumikan kay gibaharan na silang daan nga bawsan ug sunogon ang ilang mga kabtangan.
Nagduda silang ang kabanay sa mga napatay sa iyang mga anak maoy mihimo niini kanila sa tuyo nga makabalos.
Apan sila si SFO1 Berido ug FO1 Salisid nga usa lamang sa anggulo ang “arson” ang ilang gilantaw. Ang tulo ka magsuong Pebida natanggong na sa Lapulapu City Jail human sila mapasakai og kasong murder. (BANAT NEWS)