CEBU Philippines - Tulo ka mga babayeng Hapon ang gilabnihan sa ilang mga gamit sa 8:30 sa gabii diha sa Salinas Drive, Lahug dakbayan sa Sugbo kagahapong adlawa.
Ang mga biktima giila nga sila Ikeda Hesashi,24, Maeda Sho, 23, ug Arimura Hitomi ,23, ug kasamtangang nagpuyo sa usa ka hotel sa barangay Mactan dakbayan sa Lapulapu.
Samtang padayon pa sa ilang imbestigasyon ang kapolisan aron ilhon ang tulo ka mga wala mailhing lalaking maoy gitumbok nga milabni sa ilang mga bag.
Base sa imbestigasyon sa kapolisan nga ang kantidad sa maong mga nakuha sa mga tulisan dili mominus sa P300 mil lakip niini ang usa ka Rolex ug Cartier nga relos, mga mahalong alahas, cash ug mga branded nga handbags sama sa Louis Vuitton ug Channel.
Ang mga biktima igo nalang midangop sa Mabolo Police Station human sa hitabo.
Matud pa sa mga biktima nagbarog sila diha daplin sa usa ka sikat nga restobar sa Lahug ug samtang nagtabi ilang gibutang sa ilang kiliran ang maong mga bag.
Apan dihang ilaha nang puniton kalit silang gisakdapan sa tulo ka mga lalaki ug gipanguha ang ilang bags dayong karatel og dagan palayo.
Sa pagkakaron padayon gihapong gipangita sa kapulisan ang tulo ka mga lalaking manglabnihay. (BANAT NEWS)