Imbestigasyon sa severance pay ipadali
CEBU, Philippines - Misaad si Assistant Ombudsman Virginia Palanca Santiago nga dalion ang ilang imbestigasyon sa kaso sa paghatag sa Mactan Cebu International Airport Authority (MCIAA) og tunga sa milyon ka pesos alang sa severance benefits ni kanhi Department of Tourism -7 regional director Patricia Dawnie Roa.
Matud pa ni Santiago sa interbyu sa DyRF nga ang ilang buhatan nakakuha na sa halos tanang mga gikinahanglanong dokumento pagsusi kun illegal ba o legal ang paghatag sa maong kantidad ngadto kang Roa.
Gipunting sa imbestigasyon kun nganong gidali sa paghatud ug nganong secretary ang gisugo sa general manager sa MCIAA sa paghatud sa tseke alang kang Roa.
Samtang giklaro ni Santiago nga sa higayon nga ang maong benepisyo i-disallow sa Commission on Audit (COA) ang ilang buhatan mopugos kang Roa sa pagpauli sa maong kwarta.
Mibahad kining kun mahurot na ang kwarta hayan pasakaan nila og kasong malversation of public funds si Roa hangtud nga mauli pagbalik ang maong kantidad. (BANATNEWS)
- Latest
- Trending
