CEBU, Philippines - Usa ka babaye nga misukol sa tulisan gidunggab hinuon nga maoy hinungdan sa pagkaangol niini alas 8 pasado sa miaging gabii sa sitio Humayhumay, barangay Gun-ob, dakbayan sa Lapulapu.
Ang biktima mao si Concepcion Alicaway, 33, lumad nga taga San Fernando, lalawigan sa Sugbo ug kasamtangang nagpuyo sa barangay Pajo sa maong dakbayan.
Si PO1 Madeth Limpag sa Theft and Robbery Section (TRS) sa kapolisan sa maong dakbayan nga nahinabi sa Banat News miingon nga naglakaw sa maong dapit ang biktima sa dihang kalit lang gitionan og kutsilyo sa wala mailhing lalaki nga mideklarar kaniya og tulis.
Matud pa niya nga nagdumili unta sa paghatag sa iyang shoulder bag si Alicaway apan gidunggab kini sa tulisan nga maoy hinungdan sa pagkasamad sa bukton sa dihang gisagang niini ang kutsilyo ug nagdali kini sa pagsibat pahilayo sa maong dapit.
Nadala sa tulisan ang shoulder bag sa biktima nga ang sulod niini naglakip sa iyang duha ka mahalon nga cellphone, i-pod, salapi nga wala matino ang kantidad ug uban pa. (BANATNEWS)