CEBU, Philippines - Moabot sa gibana-banang P3 milyones nga kantidad sa liboan ka punoan sa marijuana ang gipang-ibot sa kapolisan sa lungsod sa Balamban ug mga sakop sa Philippine Drug Enforcement Agency (PDEA)-7 uban sa 78th Infantry Battalion atol sa ilang operasyon sa miaging buntag diha sa sitio Taro sa bukirang bahin sa barangay Bayong sa lungsod sa Balamban.
Ang maong operasyon gipangulohan ni Chief Insp. Januario Sario, hepe sa Balamban Police Station inabagan sa mga sakop sa PDEA-7 nga gipangulohan usab ni Mark Maramba ug Capt. Roy Dalumpines sa 78th IB ug mga tanod ug Civilian Volunteers.
Ang mga awtoridad nakaibot og 15 mil ka punoan sa marijuana nga hapit nang anihon sa usa ka plantasyon sa maong lugar.
Lakip sa nakuha ang lima ka kilong binhi sa MJ nga gibana-bana nga nagkantidad og P25 mil, usa ka improvised nga shotgun nga dunay pito ka buhing bala, usa ka caliber .357 nga paltik, dunay unom ka buhing bala ug usa ka cellphone nga gipanag-iya ni Reynaldo Abanto.
Si Abanto kinsa wala madakpi sa kapolisan maoy gidudahang nananom sa maong plantasyon gikatakdang pasakaan og kaso sa PDEA-7.
Ang mga punoan sa marijuana anaa karun gibutang sa Cebu Provincial Police Office (CPPO) headquarters samtang ang uban atoa sa kampo sa 78th IB diha sa barangay Nangka, Balamban ug ang uban anaa sa PDEA-7. - BANAT NEWS