CEBU, Philippines - Giawhag sa kanhi kapitan sa barangay Luz nga si Konsehal Maria Nida Cabrera ang mga magbabalaod sa pagdali og desisyon kun idayon ba o dili ang eleksiyon sa barangay ug Sangguniang Kabataan karong Oktubre.
Si Cabrera misang-at og resolusyon sa konseho nga kun mapasar ipadala ang kopya ngadto sa Ubos Balay Balaoranan ug Senado.
Sumala pa nga duha na lang ka bulan paingon sa bulan sa Oktubre apan wala pa makadesider ang Ubos Balay Balaoranan ug Senado kun i-oktaba ba ang eleksiyon sa barangay ug SK o ipadayon ba.
Pipila na ka opisyal sa Sugbo ug sa kauluhan ang mipadayag og pagsupak sa plano pag-oktaba sa eleksiyon sa mga kapitan, kagawad, SK chairman ug SK council members.
Sila si Mayor Michael Rama ug Kongresista Tomas Osmeña sa habagatang distrito sa siyudad sa Sugbo dakong supak nga i-uswag ang eleksiyon.
Plano sa pipila ka kampo nga i-uswag ang eleksiyon sa Oktubre tuig 2012.
Ang Commission on Elections mipadayag na hinuon og kaandam nga mopahigayon sa eleksiyon sa barangay.
Apan dili hinuon mogamit og precinct count optical scan (PCOS) machines ang Comelec alang sa maong eleksiyon ug i-mano-mano lamang kini.
Gipaabot hinuon sa kadagkoan sa Comelec ang desisyon sa mga magbabalaod. -