Laing mediaman gibanhigan; p.noy naalarma niini

CEBU, Philippines - Lain na usab sakop sa media ang gipasipad-an human usa ka reporter sa usa ka sibyaanan sa Camarines Sur ang gibanhigan niadtong Biyernes sa gabii, apan swerteng nakalingkawas.

Base sa report sa ABS-CBN, ang gibanhigan ug naangol mao si Miguel "Mike" Belen, 48, nga usa ka reporter sa DWEB FM sa Iriga City samtang kini luwan sa iyang motorsiklo.

Matud pa sa report, ang biktima kalit nga gibanhigan sa mga lalaking nagsakay og motorsiklo diha sa Barangay San Jose, ang biktima nakaangkon og pito ka samad pinusilan sa iyang kalawasan.

Base gihapon sa maong report, ang pag-atake gikatahong may kalambigitan sa pagsuporta sa biktima sa sa usa ka kandidato sa pagka-kongresista sa Bicol niadtong milabay’ng piniliay.

Ang National Union of Journalists in Philippines (NUJP) mipahibalong 140 na ka mga tigbalita ug media workers ang gipamatay dinhi sa nasud sukad niadtong 1986.

Sa maong gidaghanon 107 niini ang gipatay atol sa administrasyon ni kanhi Presidente Gloria Macapagal-Arroyo.

Apan ang nahitabo kang Belen, mao nay ikaduhang insidente sa pagpangatake ngadto sa mga sakop sa media ilawom sa administrasyon ni Aquino siyam ka adlaw human sa iyang inugurasyon niadtong Hunyo 30.

Ang unang insidente nahitabo sa Tabuk, Kalinga Province dihang ang brodkaster nga si Jose Daguio, 75, gipusil patay niadtong Hulyo 3.

Niadtong adlaw’ng Biyernes, si Justice Secretary Leila de Lima mipahibalo sa media kabahin sa laraw nga pagpagawas sa executive order nianang adlawa ni Presidente Benigno "Noynoy" Aquino III alang sa katukoran sa usa ka ‘super body’ nga motutok sa imbestigasyon sa media killings.

Ang National Press Club mipahibalong ang maong ‘super body’ maoy mahimong umbrella agency ilawom sa pagdumala sa Department of Justice, midugang ang NPC nga adunay representante gikan sa habig sa media nga maapil sa maong ‘super body.’

Dili palang dugay, ang NPC mipublikar og open letter ngadto kang Aquino nga nag-awhag sa pagtukod og usa ka ahensyang adunay katakos, ngipon ug gahum nga makaimbestigar sa media killings. (BANATNEWS)