Armado misulong sa pikit sa Chagrin

CEBU, Philippines - Mga nagprotestang gipangtaktak nga trabahante sa Chagrin Inc. nga pabrika sa mga furniture sa dakbayan sa Mandaue mireklamong gipang-harass sila og mga armadong lalaki atubangan sa maong kompanya kagahapon sa kaadlawon.

Kini ang nasayran sa Banat News kang SPO1 Edgar Pasaylo kinsa miingon nga mokabat sa 15 ka mga trabahanteng nagwelga sa nahisgutang establisamento ang nangayo’g tabang human sa hitabo.

Matud pa niya, usa sa mga trabahanteng nag-welga nga si Cesar Dungog uban sa mga kaubanan misumbong nga alas-2 pasado ang takna sa miaging kaadlawon kalit lang midasmag kanila ang duha ka mga dump trucks nga mihunong sa ganghaan sa maong pabrika nga ilang giwelgahan.

Diha-diha nanglayat ang mga tawong nagtaptap sa ilang mga nawong ug pulos nagbitbit og tag-as nga mga armas ug mimando kanila sa paghapa kun dili buot pusilon.

Si Virgilio Malig-on nga usa sa mga nagwelga nga trabahante mitug-an sa kapolisan nga ang iyang Samsung nga cellphone nga nagkantidad og P6,500 ug iyang pitaka nga adunay kwarta gikuha usab sa usa sa mga armado.

Dugang pa nga asoy sa maong mga trabahante nga nakasulod sa compound ang duha ka mga dump truck ug ang mga armadong mga lalaki nagpabilin sa gawas nga maoy nagbantay kanila.

Sa paglabay sa pipila ka oras ang maong mga dump trucks migawas gikan sa compound ug ang armadong mga lalaki misakay usab kini og balik dayong pabulhot og padagan sa maong dapit.

Si Atty. Ronald Baquiano nga maoy legal counsel sa nahisgutang kompaniya dihang gikahinabi sa Banat News mibutyag nga wala siya masayod sa maong pasangil.

Nagtuo hinuon siyang ang mga trabahanteng wala maapil sa nangataktak apan naapektahan na ang trabaho gumikan sa maong mga piket posibleng maoy misulong sa mga nag-welga sanglit siya ug ang tagdumala sa nahisgutang establisamento ang wala masayod sa maong pasangil.  – BANAT NEWS