CEBU, Philippines - Tukion karong adlawa sa Regional Tripartite Wages and Productivity Board (RTWPB) ang gidusong petisyon alang sa dugang usbaw sa suholan sa mga mamumuo dinhi sa Central Visayas.
Si RTWPB chairman ug Department of Labor and Employment (DOLE-7) regional director Elias Cayanong mibutyag nga ilang paningkamotan nga makakab-ot og makiangayong desisyon sa maong petisyon.
Ang Trade Union Congress of the Philippines (TUCP) pinaagi sa representante nga si Raymund Mendoza miduso og P100 nga dugang usbaw sa suholan sa mga mamumuo sa Central Visayas samtang ang Alliance of Progressive Labor (APL) nangayo og P128.
Ang mga negosyante sa Sugbo una nang mipalanog sa ilang pagsupak paghatag og dugang usbaw sa suholan human nila gihulagway nga nag-ilaid gihapon karon ang mga patigayon ug wala pa hingpit maka-recover sa kalibutanong krisis sa ekonomiya.
Gani ang regional governor sa Philippine Chamber of Commerce and Industry Robert Go mipadayag nga gikabalak-an nga mapugos pagpanaktak og mga kawani ang ubang mga kompaniya sa Sugbo kun ipamugos ang gipangayong umento sa suholan.
Ang TUCP ug APL miingon nga panahon na karon nga mangayo og umento sa suholan ang mga mamumuo sa Sugbo tungod kay wala kini modemanda niini human misabot niadtong milabay’ng duha ka tuig sa nasinating kalibutanong krisis sa ekonomiya.
Dugang sa TUCP ug APL nga angay na umentohan ang suholan sa mga mamumuo tungod usab sa pagsaka sa presyo sa mga nag-unang palaliton.