3 ka balay sa Talisay naugdaw

CEBU, Philippines - Tulo ka balay ang naugdaw ug usa ang nakan-an sa kayo sa nahitabong sunog didto sa sitio Pungsod, barangay Lawaan III, dakbayan sa Talisay sa miaging buntag. Si SFO3 Marcial Vilvestre ang imbestigador sa maong sunog mibutyag sa Banat News  nga ang tulo ka mga naugdaw nga balay gipanag-iya nila ni Ella Singson, Leonardo Dacay ug Meleta Velos, samtang ang gipahakan lang sa kayo gipanag-iya ni Natividad Delima.

Matud ni Vilvestre nga ang kayo nagsugod sa kwarto sa anak ni Singson ug gisusi pa nila ang hinungdan niini.

Ang mga balay nga nasunog ginama sa semento ug gaan nga mga dapat hinungdan nga dali ra kaayo kining gitilapan sa kayo. Miingon si Vilvestre nga ang pagpalta sa kusog nga hangin nakasalbar usab sa nagsikitsikit nga panimalay nga ginama sa mga gaan nga dapat gikan sa pagkaangin sa maong sunog.

Ang alarma sa sunog nadawat sa kabomberohan mga alas 9:22 sa buntag ug nakontrolar ang kayo human sa 20 minutos.

Gibanabana ni Vilvester nga mokabat sa P200 mil ang katibuk-ang kadaot sa maong sunog ug walay kinabuhing naangin.   – BANAT NEWS