CEBU, Philippines - Gidakop ang usa ka lalaking gidudahang maoy gipasanginlang mihilo sa duha ka mga mahalong kabayo ni Borbon Mayor Bernard “Butch” Sepulveda sa rantso niini sa barangay Logo niadtong Domingo sa alas 7:00 sa gabii.
Ang gidakop mao si Michael Brigoli, 20, ug molupyo sa sitio Bangkal, Dakit Sogod.
Matud ni SPO2 Eufrosino Aguisanda sa Borbon Police dihang nahinabi sa Banat News ang caretaker nga si Richard Villarosa, 30, nasakpan niini ang suspek sulod sa rantso ug nagtuo kining nangawat og manok.
Tungod niini iya kining gidakop apan human matugyan ngadto sa kapitan sa barangay nga si Ruben Hatamusa nadiskubrehan nalang nilang usa sa mga kabayo diha sa gawas nga bahin sa kural ang nagkadugo ang ulo ug baba.
Laing kabayo usab ang ilang nakit-ang himatyunon diha sa rantso ug gidali nila pagtambal apan namatay gyud ang usa, aron matino kun gihiloan kini buot ipa-awtopsiya sa mayor ang namatay’ng kabayo.
Matod sa kapulisan paabuton pa nila ang resulta sa gihimong pagpa-autopsy sa mayor aron maoy basehan kun angayan bang makasuhan ang suspek.
Ang maong kabayo giingong panglumba apan wala hisayri sa kapolisan ang breed niini ug ang kantidad niini. (BANATNEWS)