CEBU, Philippines - Usa ka marketing manager sa dakong kompaniya sa semento ang nakalingkawas sa tinong kamatayon human kini gi-ambusan sa usa sa duha ka mga tawo nga nagsakay og motorsiklo kagahapon pasado alas-12 sa udto diha sa Ayala Access Road kilid nga bahin sa kampo sa Cebu City Police Office (CCPO).
Ang biktima nagsakay sa iyang kolor puting bullet-proof nga Ford Everest nga nagtangag sa plakang YBH 309, giila sa kapolisan nga mao si Nestor Zamora, sa Taiheiyo Cement nga nagbase diha sa lungsod sa San Fernando.
Samtang ang gunman giila nga si Orlando Sagnoy,30, taga barangay Mactan sa dakbayan sa Lapulapu ug drayber sa motor nga si Roberto Terciro, 27, taga Mohon sa dakbayan sa Toledo ug Jerome Noel, taga Banawa Guadalupe ug usa ka contractor nga giingong maoy mastermind.
Gidemalas ang gunman nga si Sagnoy dihang nadakpan sa mga sakop sa Special Weapons and Tactics (SWAT) team pinangulohan ni Chief Insp. Arnel Banzon kinsa unang nakaresponde.
Si Banzon nga nahinabi sa Banat News mitug-an nga paingon silang maniudto sakay sa Innova Patrol Car niadtong tungora apan sa dayon na nilang gawas sa gate sa CCPO nakadawat sila og tawag kabahin sa pagpamanhig.
Pag-abot nila sa kilid sa kampo gisugat sila sa usa ka saksi ug mitudlo sa gunman nga niadtong higayona naglakaw sa Ayala Compound kay gibiyaan sa iyang kaubang drayber sa motorsiklo.
Si Sagnoy pagkakita sa mga polis boluntaryong mitahan sa kaugalingon ug gidala sa buhatan ni Chief Insp. George Ylanan sa City Investigation and Detective Management Branch (CIDMB).
Si Sagnoy mitug-an nga iyang gisab-it sa punoan sa Acacia sa Ayala ang Ingram submachine pistol nga may silencer nga iyang gigamit pagbanhig, duha ka oras human sa interogasyon gitug-an niini ang kauban ug mastermind.
Samtang sa pagsusi sa sakyanan ni Zamora nabuslot na ang bildong bintana sa drivers side ug ang side mirror niini agi sa mga bala, apan wala makalapos gumikan kay bullet proof kini.
Nakuha sa mga sakop sa Crime Scene Investigator (CSI) ang dul-an napulo ka kabhang sa 9mm ug .45 nga kalibre nga pistola. Gisusi karon sa kapolisan ang report nga misukol gamit ang .45 nga kalibreng pistola ang biktima.
Si Supt. Rex Derilo sa Regional Security Agency Guards Supervisory Section ug Chief Insp. Romeo Santander sa Regional Intelligence Division uban sa mga polis sa CCPO midakop sa duha diha sa Lahug ning dakbayan.
Matud ni Ylanan nga unang nadakpan si Terciro sa Lahug samtang nag-parking sa iyang motorsiklo ug mikooperar usab kanila ug maoy mitawag kang Noel kabahin sa gipatrabaho kanila, tuod man mibutho ang naulahi luwan sa usa ka SUV hinungdan nga kini gidakop.
Si Sr. Supt. Patrocinio Comendador, hepe sa CCPO nga ilaha karong subayon ang tanang anggulo sa ambush.
Sila si Sagnoy ug Terciro dihang gipaatubang sa media walay lipud-lipod nga mitug-an sa tanan sa planong pagpatay kang Zamora nga gisugo ni Noel, apan ang naulahi nagdumili sa paghatag og pamahayag dihang gipangutana sa media.
Si Terciro mitug-an nga usa siya ka empleyado ug sinaligan ni Noel ug giingong giduol siya ni Noel nga duna siya’y ipa-liquidate (ipapatay) bugti sa P15 mil apan siya na maoy papangitaon og triggerman.
Iyang gikuha si Sagnoy alang sa maong trabaho gumikan kay base sa iyang nahibaw-an daghan na kini og agi (napatay) apan kini gihimakak ni Sagnoy.
Si Comendador nagkanayon nga unang gibayran sila si Sagnoy ug Terciro isip down payment nga P5 mil sa kontrata nga P15 mil niadtong Hunyo 18 ug ang kulang unya na ihatag human sa ‘trabaho.’
Matud ni Terciro nga wala siya makaila personal sa biktima ug igo lang silang gihatagan ni Noel og hulagway ni Zamora lakip na sa kolor sa sakyanan ug plate number niini.
Kagahapon, diha nila giatangan sa tungod sa Insular Life sa eskina Gorordo Avenue ug Mango Avenue ug sa dihang napositibo na nila ang target ilaha kining gisundan ug pag-abot sa Ayala Access Road didto na nila kini girakrakan. – BANAT NEWS